உலக கேரம் சாம்பியன் ஆன ஆட்டோ ஓட்டுனரின் மகளுக்கு ₹1 கோடி பரிசு

காசிமேட்டில் தொடங்கி கலிபோர்னியா வரை பெண்களுக்கான கேரம் போட்டியில் இவர அடிச்சுக்க ஆளே இல்ல என சொல்லப்படுபவர் தான் காசிமா. அதனால்தான் உலகச் சாம்பியன் பட்டத்தையும் வென்று இருக்கிறார்.

தமிழகத்தில் காசிமாவின் சாதனை: உலக தரத்தில் வெற்றியும் நம்பிக்கையுமாய் ஒரு புதிய தருணத்தில் மிளிர்கிறார் காசிமா.

தமிழக விளையாட்டு வரலாற்றில் முன்னெப்போதும் இல்லாத வகையில், காசிமா என்ற 18 வயது இளம் பெண் கேரம் விளையாட்டில் வேர்ல்ட் சாம்பியனாக அங்கீகரிக்கப்பட்டுள்ளார். தமிழக அரசு, அவரின் சாதனையை கௌரவிக்கும் விதமாக, முதல் முறையாக ஒரு கோடி ரூபாய் பரிசுத் தொகையை வழங்கியுள்ளது.

யார் இந்த காசிமா?

காசிமாவின் வாழ்க்கை ஒரு சாதாரண குடும்பத்திலிருந்து உலக அரங்கில் உயர்ந்த ஒரு நம்பிக்கையான பயணமாகும். அவரது தந்தை, ஒரு எளிய ஆட்டோ ஓட்டுனராக இருந்தாலும், மகளின் திறமையை உணர்ந்து தன்னிகரற்ற அர்ப்பணிப்பை முன் எடுத்துள்ளார். அவர் பல மாநிலங்களுக்கு கடன் வாங்கி தனது மகளை போட்டிகளில் பங்கேற்க அனுப்பியதுடன், மகளின் திறமையை வளர்க்க பக்கபலமாக இருந்தார்.

வறுமையால் பறிபோன விளையாட்டுக் கனவு

காசிமாவின் சகோதரரும் ஒரு திறமையான கேரம் வீரராக இருந்தாலும், பல டைட்டில்களை அவர் வென்றிருந்தாலும் கொரோனா காலகட்டத்தின் காரணமாக தனது விளையாட்டு வாழ்க்கையை நிறுத்தி வேலைக்கு சென்றார். இதுவே, குடும்பத்துக்கு மேலும் நம்பிக்கையையும் உறுதியையும் கொடுத்தது. ஆனால் மீண்டும் கேரம் போட்டியில் விளையாட அவருக்கு வாய்ப்பு கிடைக்காததால் குடும்ப சுமையை தாங்கி விளையாட்டுக் கனவை கைவிட்டார். தனது நிலைமை தன் தங்கைக்கு வரக்கூடாது என்பதில் அவர் உறுதியாக இருந்தார்.

காசிமாவை முன்னேற்றுவதற்காக அவர்களது முயற்சிகளுக்கு ஸ்பான்சர் கிடைத்ததும், உலக அளவிலான போட்டிகளில் அவர் தனது திறமையை நிரூபித்தார்.

வாழ்க்கை முழுக்க வாடகை வீடு; இப்போ ஒரு கோடி!

தனியார் தொலைக்காட்சியில் இந்த செய்தியை அறிந்த துணை முதலமைச்சர் உதயநிதி ஸ்டாலின், காசிமாவுக்கு ஒரு கோடி ரூபாய் பரிசுத் தொகையை வழங்கினார். காசிமா கூறியதாவது: “நாங்கள் வாழ்நாள் முழுவதும் வாடகை வீட்டில் இருந்தோம். எவ்வளவு பணத்தை பார்த்ததில்லை. இந்த ஊக்கத்தொகை எதிர்கால இளைஞர்களுக்கு முன்னுதாரணமாக இருக்கும். தமிழ்நாடு அரசு கேரம் விளையாட்டுக்கும் செஸ் போன்று அதிக கவனம் செலுத்த வேண்டும். அப்போதுதான் கேரம் விளையாட்டை நம்பி விளையாட வரும் நபர்களுக்கு இது ஊக்கம் அளிக்கும் வகையில் இருக்கும்”

இளம் தலைமுறைக்கு மாபெரும் ஊக்கமாக விளங்கும் இந்த நிகழ்வு, தமிழகத்தில் கேரம் விளையாட்டு வளர்ச்சிக்கு மைல்கல்லாக இருக்கும் என்றே சொல்லப்படுகிறது.

எந்த விளையாட்டும் குறைந்தது அல்ல. அதில் திறமையும் கடின உழைப்பும் தொடர்ந்து போடும்போது கண்டிப்பாக ஒருநாள் வாசல் கதவை தட்டி வெற்றி காத்திருக்கும். நீங்கள் என்ன விளையாட்டில் ஆர்வம் உள்ளவர் என்பதை கமெண்டில் சொல்லுங்கள் பார்ப்போம்.